資料只供參考之用。讀者在投資時，應詳細參閱股份年報、招股書及其他報告內之詳情，並務請運用個人獨立思考能力自行作出投資決定。本報告/評論並不構成要約、招攬或邀請、誘使、任何不論種類或形式之申述或訂立任何建議及推薦。 投資涉及風險，股票價格可升可跌。如因相關建議招致損失，概與羅沙證券有限公司、羅沙證券之僱員、編者、作者及網站持有人等無涉。 高位入貨宜見好即收 週一港股跟外圍低開52點，但半日牛皮市冇方向，中午收市前倒升22點，半日成交金額有360億元；下午中段又回跌50多點，全日收市再稍微上升6.48點報21977.34點，國指收報12164.65點跌6.54點，全日成交639億元。內地上證綜合指數收跌10點報2588點。 週二受惠美股大升港股跟隨高開141點，但高位始終有沽壓半日成交387億元；下午僅能稍微上升25.25點收市報22002.59點，國指收報12193.31點升28.66點，全日成交703億元。內地上證綜合指數收升3點報2591點。 週三中秋但港股仍全日開放亦能高位74點，半日一度炒高升上200點樓上，成交金額有403億元；下午卻升幅收窄至45.12點收市報22047.71點，國指收報12196點升2.69點，全日成交690億元。內地今日經已係放緊中秋冇市。 週四係假期港股冇市，內地股市仍然係假期亦冇開市。 週五港股只能跟隨圍低開74點，但未夠11點經已反彈倒升61點，半日成交397億元；下午仍然係牛皮偏好收市升71.72點報22119.43點，國指收報12218.60點升22.60點，全日成交700億元。內地繼續放假冇市。 本週因中秋假期只有四日市，但港股仍然似乎長升長有進入不清醒狀態，而內地股市更因連接國慶假期黃金週而放假多過炒股，下週港股亦只有四日假，但按理可跟隨週五美股大幅造好上升１９７點而大幅上升至係，呢個亦係普遍散戶心態，因為時差存在而令市場人仕可以睇住美股隔晚造好而繼續炒高港股，但問題係當全世界所有人仕都一面倒地看好港股走勢的時候，反而係要小心高位隨時回落之時，因為講真呢個幾月以來無論外圍同內地數據都唔係咁靚仔，但何以個市反而不斷創高位？坊間理由不外係憧憬美國有QE2呀等，其實如果有反而仲唔係一件好事，因為好似一個病人經已比咗劑重藥佢服用但未見有好轉，再比多劑佢食，短期就會有效，但咁姐同時埋下另一個計時炸彈，等佢下次再爆時仲勁啲，到時就難以想像。所以話如果家吓買咗貨的投資者宜見好即收止賺咗先，如果他日個市因一個不利消息插返落嚟而你又唔願止蝕的話，咁姐將之前所賺嘅容乜易比返曬佢，睇返四、五月爆發歐債危機之後個市基本上係造好多個造淡，淡友哩排真係冇啖好食，積埋積埋嚟一個大反攻的話，多數只係買升的散戶就好容易血流成河，又焗住做蟹坐艇；所以牛二期買落的貨宜見好先止賺，等個市調整反咁上下冇人敢買果時，你再逆向而行勇於入貨，好似近排有大戶唱好新能源汽車股例如比亞迪股份(1211)咁，趁住下週地球兩大有 錢佬其中一個仲係比亞迪大老細巴菲特股神添，咁仲唔係一個高位出貨良機咩，所以話見好即收、揸現兜兜最實際，有錢你驚買唔到平貨呢。數據顯示聯儲局未來一段時間亦唔會加息，姐話仍要以目前方法去刺激經濟，咁通脹想唔嚟都冇可能啦，即係呢個＂美國病人＂仍要食住＂類固醇＂先，以後再算啦個市咪炒高住先囉，不過遲早會插返低果陣時至係最佳的入貨良機。 德昌電機(00179) 上週港股再向二萬二點徘徊, 最高22,229點, 週五收報22,119 ,最低21,874點；一週總成交2,734億。今期推介德昌電機(00179), 股價曾在2000年升至19.25元的新高位, 是憑著研究將摩打精密化供應汽車的概念, 由量走去質, 投資主題轉變, 令股價表現幾何級上！但銅、鉛及鋼價升得更厲害, 終由盛轉衰跌至1.03元。德昌?手將摩打打入內地市場及進一步擴大內地銷售, 若成功就如市場預期純利有38%增長! 故現價買入, 長線可向10元進軍, 惟跌10%要先離場! 羅沙證券、許向輝 證監會(第一類)證券交易牌照持牌人 (編號AQX 415) 2010年9月27日 (本文作者聲明於建議時並沒有持有以上建議買入或沽售之股份)